يا عزيزي كلنا وشوش

يا عزيزي كلنا وشوش

حاجة غريبة لكن كلنا بنعملها؛ تلاقي حد بيتعامل مع الناس بشخصية وشكل وأسلوب معين، وبيتعامل مع القريبين منه بشخصية تانية خالص، مثلا واحد مع الناس هادي وصبور في الشغل ومع الناس الغرب، وفي البيت عصبي ومبيستحملش حد.

وكمان تلاقي نفسك عايش في أحلام وطموحات ومبتفكرش إزاي تحققها، والأغرب من كدة إنك ممكن تلاقي نفسك مش قادر تبوح بالأحلام دي قدام الناس.

عشان نفسر كل الأمور دي لازم نشوف الموضوع من كل زاوية، ولكن مبدأيا الأسباب الرئيسية للازدواجية دي حاجتين:

1 – الاحباطات اللي بنشوفها في حياتنا كل يوم.

2 – وكمان مفيش الثقة في النفس الكافية اللي تخليك تحارب عشان حلمك.

والازدواجية عيب خطير جدا في مجتمعنا ومنتشر أوي؛  فتلاقي كل واحد عايش شخصيتين في نفس الوقت، يعني الناس اللي ليهم شخصية تانية مع القريبين منهم غير الشخصية اللي قدام الناس ممكن ده يكون بسبب أن الناس في مجتمعنا بتتدخل في الأمور الشخصية لبعض بشكل كبير أوي وتلاقي أي حد يعمل حاجة لازم يقدم مبررات للناس؛ فعشان كدة كل واحد بيحاول يعمل شخصية مختلفة قدام الناس عكس حقيقته علشان يتجنب انتقادهم، وكمان ممكن يكون بيعمل كدة مع القريبين عشان ضامن إنهم هيستحملوه (!!!)، ولكن مفكرش أنه لازم يكون على طبيعته والناس تقبله بعيوبه؛ لأن كدة كدة العيوب دي بتظهر في وقت الغضب أو في وسط الكلام؛ يعني القناع اللي لابسه وفاكره بيغطيه بيطلع شفاف وبيكشفه.

أما بخصوص الناس اللي مبتقدرش تتكلم عن أحلامها وبتفضل عايشة جواها لوحدها، ممكن ده يبقى بسبب الاحباطات اللي حوالينا وقلة فرص النجاح في أي حاجة، فتتحول الأحلام الطموحة لأحلام يقظة وتبقى مجرد حيلة دفاعية لتفريغ شحنة الانفعالات السلبية، مع إنها ممكن تكون أحلام واقعية ومشروعة وتتحقق بشوية تعب.

والحل بسيط أوي، لازم تتحرر من كل القيود اللي بتقيدك وتواجه نفسك بصراحة وتتصالح معاها وتعرفها على حقيقتها بمزاياها وعيوبها من غير تدليل ولا جلد للذات، وبعد كدة اخرج للناس بالروح دي واتصالح معاهم، هتلاقي نفسك مش محتاج تخبي حاجة؛ لأن كل واحد له عيوبه وكمان له مزاياه، بس المهم أنا بركز على إيه عيوبي ولا مميزاتي؟؟

يعني متفتكرش إنك ممكن تبقى أقل من أي حد لأن مفيش إنسان من غير عيب، ولو قارنت على حسب اللي أنت شايفه تبقى بتظلم نفسك؛ لأنك متقدرش تعرف غير اللي عينيك شايفاه وعينيك مش بتشوف كل حاجة ، وكمان لازم تكون واثق في عدل ربنا وإنه مبيديش حد اكتر من حد.

لكن لو فضلنا نخبي مشاعرنا وأفكارنا الحقيقية عن الناس، بالإضافة أن ده نفاق هو كمان هم وشيلة تقيلة؛ لأن أي حد بيخبي حاجة بيبقى شايل هم إنها تتكشف وتلاقيه بيبذل مجهود كبير عشان محدش يكتشف اللي مخبيه.

وتيجي في وقت كدة تحس إننا كلنا عايشين في مسرحية وبنمثل على بعض والكوميدي في المسرحية إننا كلنا عارفين إننا بنمثل على بعض ودي مش حقيقتنا.

الحياة البسيطة أجمل وأكتر حرية، وأحسن لما أفكر كل يوم يا ترى هلبس أي وش النهاردة؟ وأكون في نص هدومي لو اكتشفت مرة إني نسيت الوش ومجيبتوش معايا .... عيشها ببساطة احسن.

رابط موقع اليوم السابع: http://www1.youm7.com/News.asp?NewsID=1155829&SecID=190&IssueID=0